iPhone 5尋日正式喺香港推出，尋日就有某電訊商舉行新機發布會，新當選嘅資訊科技界立法會議員莫乃光（Charles）都去咗趁熱鬧，仲將幾張活動相片放上facebook，加埋一句「not my own iPhone 5, yet」（未係我嘅iPhone 5……住），狀甚興奮。不過有人就質疑Charles身為候任立會議員，成個代言人咁幫人賣廣告，係咪收咗電訊商錢㗎？
Charles向本報澄清，自己只係應邀出席活動，見到成班記者朋友，咪貪得意拎部電話上手影吓相囉。佢既無上台影相致詞，亦無收任何報酬，自己想買iPhone 5都要經正常途徑訂購，絕無打尖換機。再者佢並非只出席某個牌子或某間電訊商嘅活動，其他公司搞嘅佢都去過，完全無意幫人賣廣告。
Charles又強調，作為一個IT人同IT界代表，得閒要出席吓呢類活動，了解業界嘅最新行情，否則好快會out（落伍）晒，同啲IT界選民無偈傾。佢立即申報自己有用其他公司嘅電子產品，形容自己只係個普通嘅用家同粉絲。