政情:利國偉捐款中大設獎學金

明年就係中文大學金禧誌慶,中大希望籌募更多獎學金讓學子受惠,一話籌錢,向來樂善好施嘅利國偉伉儷及偉倫基金再次慷慨捐款三千萬港元畀中大,用以成立「利國偉中大金禧獎學基金」。獎學金將由一三至一四年開始頒發,而基金每年衍生嘅利息,將用以永久資助多項學生獎學金,包括非本地生獎學金、海外交流獎學金、及為法律學院和醫學院學生而設嘅獎學金。

中大尋日為基金舉行成立典禮,利國偉夫人代表偉倫基金送贈三千萬港元支票畀中大。校長沈祖堯讚揚利國偉對中大貢獻殊深,中大創校初期就已經加入校董會,推動中大發展不遺餘力。副校長鄭振耀就話所有受惠學生將成為「利國偉中大金禧學人」,日後會喺舉行嘅茶敍中親身向捐贈人致謝,同分享學習點滴。適逢政府剛推出第六輪大專院校配對補助金計劃,中大將獲政府配對額外嘅資助,讓更多學生受惠。

第一手消息請下載on.cc東方互動iPhone/iPad/Android/Windows Phone Apps