中環出更：家電大佬助人願望成真

見到咁多老友捧場，身兼提升快樂指數基金會長嘅Edward開心到笑不攏嘴，即場宣布將賓客嘅禮金全數捐出，成立「開心願望成真」專項基金，幫助有需要市民完成有意義、上限為一萬元嘅願望。佢仲話，如果禮金唔夠數，就自掏腰包補夠數至三十萬元。此話一出，老友踴躍響應，李錦記集團主席李文達爽快「配對」捐出三十萬元，阿Roy都唔執輸，捐出五萬元。

申請者要係香港居民

基金義務總幹事陳詠梅話，申請者不分年齡、國籍及種族，只要係香港居民就得喇。着住白色長褲配襯白色鞋嘅馬時亨，成為晚宴焦點之一，事關佢難得着得咁瀟灑，身形仲愈來愈fit添，個個都讚佢靚仔。工總青委主席孫榮聰（Eric）好雀躍報料話，下月底將率團到台灣參觀兩家大型手機及電腦製造商，由於機會難逢，青委兄弟姐妺爭相報名，三十個名額好快就爆滿。

李文達夫婦（前左、右）慷慨解囊，鍾志平（後右）及唐偉章（後左）猛讚好。	馬時亨（左）及陳詠梅（右）係提升快樂指數基金嘅中堅分子，老友鬼鬼。	陳嘉慧（中）都係工總青委成員，與孫榮聰（右）及劉燊濤（左）好啱傾。

卓妮