政情：謝偉銓帶隊考察戈壁沙漠
開發新能源，係時興熱門話題，新當選為建築測量及都市規劃界立法會議員嘅謝偉銓（Tony）都迎合大勢，趁立法會仲未開會，佢本月下旬會帶隊考察新疆戈壁沙漠，仲搵埋前律政司司長梁愛詩嘅哥哥梁狄剛任導遊，原來梁狄剛來頭十分勁，係中國石油勘探開發專家。
考察隊將於呢個星期六出發，為期一星期，同行約有四十人，以專業及資深人員協會為班底，包括前會長胡曉明、理事楊素珊同極地探險專家李樂詩等。李樂詩與梁狄剛相識多年，今年搵到對方隨隊，認真夠面子。梁狄剛係教授級嘅高級工程師，擅長鑽探石油，係專門嘅技術人才。今次行程主要考察新疆南部塔克拉馬干沙漠嘅石油勘探，認真專業。塔克拉馬干沙漠係中國最大嘅沙漠。熱愛畫畫嘅楊素珊話要帶定文房四寶，佢有旅行裝墨硯，會即興將新疆美景，以國畫筆觸留住回憶。