政情：吳文華退休生活忙過返工
立法會秘書長吳文華（Pauline）返工到本月廿八日正式退休享受人生。但預計佢退咗休仲會忙過做秘書長，又要寫書，又要周遊列國。
喺回歸前嘅立法局，同之後嘅臨時立法會及立法會一共服務廿二年嘅Pauline，任期已經到咗倒數階段，大家排隊同佢餞行，今日就約咗傳媒茶敍。Pauline咁鍾意做嘢，點會停落嚟？佢會放假三個月，然後就擔任崇德社東南亞代表，周遊列國推動婦女權益，任期兩年。之後仲會用三年時間，為立法會將過去嘅案例輯錄成書。呢個任務，係上一任嘅立法會主席曾鈺成交付畀佢，而佢亦都會收取酬勞。
為咗交接，候任秘書長陳維安都已經上任兩個月，聞說陳維安大小會議統統去齊，Pauline同低級職員開會，佢都有列席，以便加快上手。Pauline話，立法會工作已有晒規矩可依，交棒絕對放心。