政情:陳恒鑌「愛的承諾」無法兌現

民建聯候任立法會議員陳恒鑌(Ben),雖然年紀輕輕,但同太太已經有個兩歲半嘅可愛囡囡,佢早前接受訪問時曾透露,選舉完結後會抽時間陪家人去旅行,但佢尋日喺社交網站宣布旅行計劃告吹。

阿Ben話,選舉完後依然冇停過,原本諗住抽三幾日陪太太同女兒去外地玩吓,爭取時間同家人相處,順道幫自己充電,但由於市民對佢好有期望,所以呢幾日都會抽時間睇定啲立法會文件,做好準備。太太見佢咁勤力,都主動提出取消旅行,話第時得閒啲先補番數喎。

難得太太咁體貼,搞到阿Ben都好感動,為咗補數,遲啲會帶埋老婆同個女去香港迪士尼樂園玩番轉。佢話囡囡只得兩歲半,其實去唔去外地都冇所謂,最緊要一家人喺埋一齊,三口子齊齊同啲卡通人物拍照兼玩遊戲,相信囡囡都會收貨嘅。

第一手消息請下載on.cc東方互動iPhone/iPad/Android/Windows Phone Apps