中環出更：葉振南帶潮青北上拓商機
潮州商會青委早前已順利換屆，經營啤酒代理生意嘅葉振南（Stephen）正式接棒做主任，日前喺金鐘萬豪酒店舉行就職禮，近百位「潮人」拉隊到賀。新一屆青委陣容鼎盛，除Stephen外，副主任陳德寧、黃仰芳、林月萍、林淑怡及章曼琪等，個個都係青年才俊。Stephen上任後放眼神州，將帶領潮青開拓內地商機。
一班潮青向來玩得，Stephen話，年底將拜訪潮汕三市，又會大搞潮汕語言文化研習班，不愁冇節目喇。聯誼之餘，都要為「錢」途着想，Stephen睇中神州經濟騰飛，計劃組織更多商務考察團與內地企業交流，學習管理經驗。佢舉例話，內地唔少省市嘅街燈，早已用太陽能發電，香港都望塵莫及，再唔加倍努力，好易被邊緣化。
工廈改住宅 陳振彬冇份
政府話要放寬工廈改建住宅限制，揸住唔少觀塘及長沙灣工廈嘅觀塘區議會主席陳振彬（Bunny），即時被人以為佢中獎。Bunny卻自嘲係「受害者」，佢話手上工廈十幾年前已補地價變身工貿大廈，所以新政策點正斗都唔關佢事。美國再度推量化寬鬆政策大印銀紙，Bunny就買定息債券保值，佢呼籲大家咪揸晒現金，否則一定貶值喎。
卓妮