政情：海關演奏會鬧小風波
政務官出身嘅海關關長張雲正，唔單只投入海關工作，連下屬個仔開鋼琴演奏會亦親身嚟捧場，認真畀面！海關員方尋晚喺北角總部搞咗個四手聯彈、雙鋼琴演奏會，其中一名演奏者尹俊邦係香港鋼琴家協會主席，曾奪得多個國際獎項，前年更獲邀到波蘭為蕭邦誕生二百周年舉行獨奏會。
尹俊邦來頭咁猛，多人捧場其實好正常，但由於佢亦係海關訓練學校一名教官嘅公子，因此惹來一場小風波，有海關人員投訴，質疑尹父向學員硬銷門票，又要下屬喺當值期間到場做帶位員，門票收益唔知邊個袋。
張雲正聽到有關投訴後大表心痛，話今次係海關員方第一次搞音樂會，聽眾全部都係關員同佢哋嘅親友，個個都樂在其中，全部同事都放咗工先自願嚟幫手。至於八十元門票嘅用途，答案就喺個琴度，原來上面有鋼琴王子李雲迪嘅簽名，運送、保險同調音樣樣都要錢，絕對無人私下落袋。