中環出更:甘蕎因吞鏞記「董事長」落肚

香港老牌食肆鏞記酒家為慶祝七十周年,本月中將首次推出美酒配佳餚菜單,以多款招牌菜配襯「鋼鐵大王」龐鼎元孫子龐建貽旗下大亞洋酒代理嘅靚葡萄酒。鏞記創辦人甘穗煇次子甘琨禮嘅掌上明珠甘蕎因(Yvonne),日前罕有地現身推介,講起自家美食如數家珍。Yvonne仲話,鏞記八樓嘅私人粵菜會所「嚐真」推出嘅美酒佳餚尊貴菜單,饒富香港風情嘅菜式名稱就係出自大伯甘健成之手。

最愛「絕版」咖喱炒飯

今次菜式梗唔少得傳承七十年嘅金牌燒鵝,仲有禮雲琵琶蝦、花膠雞絲羹等經典美食,套餐更搭配法國頂級酒莊Mas de Daumas Gassac出品嘅葡萄酒。Yvonne生於美食世家,自細唔憂食,要數最鍾意嘅菜式,莫過於不在菜單上嘅「咖喱牛崧炒飯」,佢話呢味炒飯曾經喺今年春季短暫擺上菜單,食過嘅朋友都讚好。當日佢仲臨時叫廚房攞出爺爺生前獨享嘅腐乳,與大家分甘同味,由於當年廚師專為爺爺而醃製,所以腐乳有個花名叫做「董事長」喎!

第一手消息請下載on.cc東方互動iPhone/iPad/Android/Windows Phone Apps