政情：周永健細細個偷睇賽馬
身為律師嘅馬會大董周永健（Anthony），原來佢對馬匹嘅熱愛與生俱來。佢喺香港律師會最近一期《香港律師》會刊中自爆，人生第一次觀看賽馬係小學三年級，當時身為馬主嘅爸爸怕佢染上賭癮，所以唔鼓勵佢參與賽馬活動，有次佢擅自走去快活谷馬場外嘅「大石鼓」，與大批市民觀看馬匹掠過時嘅震撼英姿，快感十足。自此佢經常懇求司機載佢去上址睇賽事，然後趁爸爸喺賽事完結返屋企前，溜回家中。
後來Anthony去英國讀書，對馬匹嘅熱愛未減，更迷上鑽研馬匹系譜，矢言要追上英女王對馬匹配種知識嘅水準。後來佢終於一嘗做馬主滋味，首匹愛駒命名為「快感」，正係形容佢欣喜若狂嘅心情，往後佢嘅愛駒都以「感」字命名。
Anthony又自爆瘀事，喺英國期間曾經學習策騎，心諗咁至令到自己對賽馬嘅熱愛變得完整，殊不知首次全速策騎前進時就遇小意外，經此一役，佢就認定做馬主安全過做騎師喎！