臭竹枝阻街無人理
「啲竹堆咗喺度成個月，對面間餐廳仲成日潑啲污水落去，呢排天氣咁熱，啲竹阻街不特止，擺咁耐都唔知會唔會發臭生蟲！」羅先生指長沙灣元州街及發祥街交界近日有大量竹枝被棄置於路旁，阻塞通道的同時，更帶來衞生問題，曾多次致電政府熱線1823投訴，卻未見有人清理，「打去1823問，食環署話唔關佢哋事，地政署就淨係黐張紙叫物主嚟清走啲竹枝，結果都係得個吉！」
環保署發言人表示，過去從未接獲相關投訴，接獲本報轉介後即時到場調查，發現有關的竹枝已被清走。
「原來係環保署嘅事，點解啲部門淨係識話啲嘢唔關自己事，但又唔畀番處理嘅部門搞？呢個係乜嘢政府嚟㗎？」羅先生不滿政府部門互相卸責，認為棄置竹枝只屬民生小事，卻久久未能解決，令市民求助無門，認為當局必須檢討。