政情:發叔歸隊撐民記

鄉議局主席劉皇發喺今次立法會選舉左右做人難,事關民建聯(民記)同鄉事派候選人都想得到發叔支持,爭取數以萬計嘅鄉事票。原本發叔只係力撐鄉事派候選人,但隨着選舉逼近,佢喺各方壓力下都要被迫歸隊,集中票源力撐民記候選人。我哋仲收到消息,發叔同四個元朗鄉事委員會主席,尋日一早就被急召上深圳照肺,下午先返港,據聞係要鄉事派全面歸隊力撐民記候選人。

新界東同新界西兩個選區競爭激烈,當選同出局之間可能只係相差一萬幾千票,鄉事派嘅選票顯得格外重要。今次選舉同過去唔同嘅係,鄉事派喺新界東、西都有派人出選,好似新界東選區,發叔最初只係支持自己友邱榮光,但上星期喺鄉議局副主席張學明穿針引線下,終於簽埋同意書支持民建聯候選人陳克勤,尋日仲應承落大埔區幫克勤仔站台拉票,可惜臨時被急召上深圳,被迫甩底。

民記全面告急 集中票源

建制派操盤人其實一向唔希望鄉紳自己派隊參選,希望同往屆一樣集中票源支持民記,所以鄉紳派隊參選令發叔近兩個月受盡壓力,而且愈近選舉、壓力就愈大,畀人照肺多過食飯。據聞尋日深圳方面發出嘅要求好清晰,就係要元朗班鄉紳指示村民全力支持民記嘅超級區議會及地方選區嘅候選人,簡單啲講,民記候選人真係要全面告急。

雖然發叔同班鄉紳被人照肺唔係第一次,但今次嘅照肺語氣明顯較以往強硬,有人形容已經唔係「要求」,而係「命令」。有政界人士就估計,鄉紳們未必再撐得落去,明日投票時幾唔情願都好,都要乖乖支持民記。新界東候選名單仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、葛珮帆、梁國雄、龐愛蘭、何民傑、梁安琪、方國珊、陳國強、龐一鳴。

第一手消息請下載on.cc東方互動iPhone/iPad/Android/Windows Phone Apps