政情:唐營林大輝挺梁粉謝偉銓

建築、測量及都市規劃界候選人謝偉銓(Tony)尋日搞咗場參選大會,除咗獲唔少業界撐場外,前房屋署副署長鄔滿海、香港單親協會總幹事余秀珠及自動當選立法會工業界嘅林大輝都有現身支持。林大輝仲笑笑口話,之前佢支持嘅特首候選人落敗,所以今次特登搵個會贏嘅人嚟支持。眾所周知大輝係唐營核心成員,而Tony就係「梁粉」,莫非真係實現大和解?

大輝解釋,佢同Tony相識十幾年,大讚Tony為人真誠,又話前幾年已勸Tony出嚟參選立法會,相信Tony能勝任立法會議員。大輝又大嘆自己喺立法會孤軍作戰,搞到工廈活化議題咁多年仍冇乜進展,所以希望將來大家可以拍住上。Tony就話有信心今次投票率會多過上屆嘅六成四,又話目標係攞到超越對手上屆嘅一千四百票當選。同界別候選人仲有劉秀成及吳永輝。

第一手消息請下載on.cc東方互動iPhone/iPad/Android/Windows Phone Apps