政情:劉江華選情告急大賣廣告

建制派喺超級區議會選舉預計坐二望三,其中工聯會陳婉嫻同民建聯劉江華一直被看高一線,反而行政會議成員李慧琼就要力爭最後一席入局,殊不知最新民調卻有出人意表,劉江華選情突然大墮後,喺七張名單僅排名第六跌出當選之列。劉江華形容,目前選情危險要告急,再三呼籲民建聯新界支持者投票支持佢;至於會否要求工聯會過票,佢相信會好難,因為始終係兩個系統運作喎。

除咗大打「告急牌」,劉江華喺選舉倒數階段亦大灑金錢賣選舉廣告,其中紅磡港鐵站往西鐵方向嘅大型廣告,粗略估計要近二十萬元。佢話呢個廣告係同該黨新界其他名單一齊宣傳,攤分後平均每隊要畀二至三萬元,希望可以更清晰表達分隊同分票概念。

講開拉票工作,自言「又黑又瘦」嘅劉江華反而肥咗一公斤,有次着住件選舉背心去廁所時,有街坊睇住佢背影竟然話佢「有八成似劉江華」,令到佢當場要即時擰轉身表露身份喎。

第一手消息請下載on.cc東方互動iPhone/iPad/Android/Windows Phone Apps