做得清潔工都唔慌收入高，個個月賺雞碎咁多，一日三餐餵飽自己都成問題，假如仲要養妻活兒供書教學，嗰種慘況真係不足為外人道。萬一清潔工遇上無良僱主，失驚無神炒魷魚不特止，遣散費更加拖到無影無蹤，你估有幾慘吖嗱？
偏偏地球之上真係有好多毫無良心可言嘅兩足動物，打完齋唔要和尚，過咗橋竟然抽板，話佢哋禽獸不如恐怕侮辱咗真正嘅禽獸。尋日喎，大約三十名外判清潔工人去到金鐘政府合署嘅食環署總部示威，抗議政府外判商拖欠總共二百萬元嘅遣散費。清潔工人職工會組織幹事施城威係咁講嘅，呢間大型清潔外判商承辦咗食環署同康文署等等好多政府部門嘅清潔服務，舊年十二月遣散員工之後一直拖欠遣散費，受影響嘅一百六十幾名工友決定打官司討公道，今年七月得到勞資審裁處判決勝訴，之但係至今仍然未有應得嘅遣散費落袋。
大家睇到呢度應該已經火滾，勞資審裁處都有判決啦，外判商居然睬你都傻繼續拖欠遣散費，無恥果然無極限。不過咁，只要你聽埋受害者嘅指控，包你嘅火滾程度節節上升，工會話呀，食環署照樣向呢間外判商批出五千萬元合約。所以咯喎，受害者要求食環署落實扣分制，將有問題嘅公司列入黑名單，取消新批出嘅合約，又要求勞工處遵守法庭判決，協助工友取回遣散費。
唉，你話係咪弊一弊都冇咁弊吖？原來無良僱主背後最大嘅靠山係特區政府，拖欠遣散費係冇必要接受懲罰o架，反而有五千萬元合約作為獎賞。官老爺違反賞善罰惡嘅大原則，即係變相鼓勵奸商放膽剝削員工，食環署想唔認助紂為虐都唔得啦，吓話！
政府不斷將工作外判，可惜同時亦將責任外判，功夫茶想問一問食環署署長梁卓文太平紳士，如果慘遭剝削嘅係你紳士大人自己，庫房唔知點解硬係唔肯出糧畀你開飯，或者無端端炒你魷魚又唔畀遣散費，你會有乜嘢感受呀？會唔會有衝動殺入禮賓府見人就鬧呀？做人嘅嘢最好將心比心，己所不欲勿施於人，咁先至有機會避免被稱為狗官吖嘛。
政府有一套外判合約計分制o架，外判商大幅裁員會扣分，日後難以投得政府合約，扣滿六分可被罰四個季度之內不得競投，若然外判商提供更好待遇畀員工就會加分。問題係，官僚作風永遠係多一事不如少一事，少一事不如唔做事。
咁啦，受害清潔工直接搵梁卓文算帳，太平紳士話唔定良心發現呢。