政情:陳健波葉國謙講風涼話

立法會選舉功能組別有十六個議席自動當選,包括成功連任嘅保險界陳健波及區議會(第一)嘅葉國謙。喺冇競爭下成功連任嘅陳健波話,保險界選民以公司為單位,只有百幾個選民,但就算將來擴闊選民基礎都冇有怕喎。葉國謙話自己成世人未試過自動當選,冇人參選啲感覺好似唔知點咁,呢啲咪係講緊風涼話囉!

陳健波尋日喺電台錄音節目中話,唔少人都覺得功能界別要擴闊選民基礎,而保險業內從事中介、代理工作嘅人亦都想有投票權,所以建議每間公司增至十票,又或者公司票同中介人投票嘅比重各佔一半。莫非佢真係諗住保險界冇競爭,就算幾多選民佢都可以自動當選呢?

同樣都係自動當選嘅葉國謙話︰「知道冇人參選時都有啲感覺,唔知咩味道。」對於有啲聲稱「葉國謙不代表我」嘅泛民主派區議員選民,佢就話︰「十個提名就可以做(參選),點解唔去做又咁大反響?」真係搧住扇講風涼話。眾所周知,區議會幾乎被建制派壟斷,泛民勝選機會微乎其微,而民建聯高層又打壓旗下年輕區議員參選,先至令佢繼續霸住個位啫。

第一手消息請下載on.cc東方互動iPhone/iPad/Android/Windows Phone Apps