政情：Tim霍普通話全場最爛
香港作為國際都市，兩文三語好重要，同內地來往頻繁更要學好普通話。特首梁振英同國家體育總局劉鵬尋日喺國家金牌運動員歡迎酒會上先後以流利普通話致辭，但港協暨奧委會會長霍震霆（Tim霍）就以「全場最爛」嘅普通話作總結發言，仲非常甩轆咁講咗四個「所以」，惹來台下不少人士竊竊私語。
早前宣布放棄連任立法會議員嘅Tim霍話，日後會專注打理家族事業，又話雖然自己唔會再做議員，但仍然會爭取連任下屆奧委會會長，喺其他平台繼續服務市民。尋日Tim霍嘅大仔霍啟剛都有出席酒會，佢話爸爸做咗咁多屆議員都好應該讓畀其他人做，可以休息吓同多啲陪家人。
Tim霍又大讚疑似繼任人馬逢國有心服務社會，有出席酒會嘅馬逢國就透露，曾經拜訪過Tim霍尋求支持，又話Tim霍希望佢可以為體育界做多啲工作。至於有冇叫Tim霍幫手拉票，馬逢國就笑笑口話：「我諗佢識做o架喇，唔使我教佢啦！」體育、演藝、文化及出版界候選人仲有周俊輝及蕭思江。