已卸任特首嘅貪曾在任內盲目篤信「政治化妝術」，唔願擺多啲時間做好政策制訂工作，喺本末倒置嘅情況下自然難以取信於民。本身係傳媒出身嘅新任新聞統籌專員（IC）鄧惠鈞（June）尋日啱啱上任，問到有乜公關技巧要注意，佢話依家市民好聰明，最重要政府做啱政策，否則做幾多公關都無用，阿姐果然係公關界高人！
懸空多時嘅IC終於揭盅，特首辦宣布由退休傳媒人阿June出任。梁班子上場後多次捲入負面新聞，令呢個「熱廚房」嘅熱度有增無減，甫履新嘅阿June接受查詢時話，自己一直希望為香港做啲嘢，相信只要政府做得好，呢個廚房自然無咁熱喎。佢又相信，特首梁振英（CY）肯出來見人同講嘢，只要坦誠溝通，就冇乜問題搞唔掂。
阿June曾經喺無綫新聞部任職十多年，離職前係無綫電視新聞及公共事務總監，之後又曾出任馬會公共事務部主管多年，直到去年先退休，難怪CY會邀請佢出山幫手喇！