中環出更:施榮恆遊沙巴 回歸大自然

東南亞係暑假旅遊熱門勝地,東華三院副主席施榮恆(Ivan)一家都趁暑假遊馬來西亞沙巴,佢同太太Irene及囝囝施湧德(Elvin)夜探螢火蟲,日睇長鼻猴,回歸大自然,認真寫意。

帶囝囝夜觀螢火蟲

沙巴海灘出名水清沙幼,點可以錯過碧波暢泳。五歲嘅Elvin啱啱學識游水,初次喺大海暢泳,估唔到全不怯場,仲游得似模似樣,爸爸Ivan都話嚇一跳。游完水後,大家嫌未夠喉,帶隊觀賞螢光蟲,Elvin初次見到黑夜中嘅螢火蟲光,開心到唔捨得走。Ivan就慨嘆小時候經常喺香港山頭以追逐螢火蟲為樂,可惜依家買少見少,要到沙巴先睇到喇。

講到食,近海嘅沙巴海產極之豐富,當中以瀨尿蝦及中蝦最著名,價錢平過香港一半,Ivan把握機會大擦靚蝦,家人都豎起拇指讚正斗。臨走前,少不免掃吓馳名嘅咖啡豆做手信,滿載而歸。

卓妮

第一手消息請下載on.cc東方互動iPhone/iPad/Android/Windows Phone Apps