經濟學家佛利民講過：最愚蠢嘅行為，就係用出發點嚟判斷事情嘅好壞對錯。乜嘢意思？意思好簡單，即係提醒大家千祈咪好心做壞事。嗱，就好似港府推出嘅長者及殘疾人士乘搭巴士優惠計劃咁吖，話就話敬老，點知陷阱處處，長者轉乘車費隨時貴過以前，因減得加，你話係咪愚蠢吖！
根據相關計劃，長者可以用兩蚊乘搭大部分巴士路線，原意係鼓勵老人家多啲外出活動，出發點絕對係好嘅。但本報記者追查發現，由於港府考慮不周，安排不當，新優惠推出後，原有嘅部分轉乘優惠組合計算方法有變，長者喺假日乘搭轉乘路線嘅車資竟然不減反加，最離譜嘅例子係貴咗十九倍，問你服未？唔怪得有人稱之為加費陷阱，真係冇講錯o架。
咁都未算吖，六十至六十四歲長者如果想繼續享用兩蚊假日乘車優惠，就要轉用個人八達通，否則貴客自理。唉，咁即係擺明為難老人家啫，究竟想敬老定係虐老先？講真吖，巴士轉乘優惠計法咁複雜，後生仔女都睇到一頭煙啦，何況係老人家，試問有幾多人可以咁心水清睇熟晒啲指引同埋細則呢？港府淨係宣傳話兩蚊可以搭巴士，老人家又點會估到有咁多陷阱吖。呢，優惠計劃原意係鼓勵老人家多啲外出，依家反而嚇親老人家，搞到好多人更加唔敢出街，真係弄巧反拙，未見其利先見其害。
講到尾，安老政策又好，優惠計劃又好，最緊要簡單直接，方便實惠，唔好搞到咁複雜，令長者無所適從。正如有人話齋，巴士轉乘計劃嘅取巧計算方法，一般人都未必明白點計，要長者去計只會增加佢哋嘅心理負擔，令長者更加唔想出門，呢啲咪就係典型嘅好心做壞事囉。
係人都知，港府縮骨，安老政策天殘地缺，老無所依、老無所養嘅大有人在，早就備受詬病，如果連呢啲小恩小惠都搞唔好，實在好難令人相信當局嘅誠意。計功夫茶話齋，既然有心推出交通優惠計劃，好心港府官僚就盡量做好啲，令到計劃簡單啲，唔好再為難老人家喇，家陣同老人家斤斤計較，咁又點算係敬老喎。
講開又講吖，呢啲小恩小惠充其量表達一份心意，無可能解決基層長者嘅困境，香港人口愈來愈老化，安老問題愈來愈嚴重，當局最緊要盡快制訂長遠嘅安老政策，咁先至係治本之道。民生無小事吖，安老問題唔拖得嘅喇，知冇！