政情：功能組別 杜蟲助箍票

立法會「大懶蟲」霍震霆、黃宜弘、李國寶等議員，「少發言、少開會」嘅形象深入民心，建制派中人一直有苦自己知，皆因要喺重要議題數夠票撐政府，甚至夠人開會都係一大難題，如果稍一不慎更會被泛民主派偷襲，甚至搶佔議題「興風作浪」。就以最近立法會「拉布戰」為例，建制派為湊夠人數開會都絞盡腦汁，仲編埋更表力求萬無一失，好可惜部分功能界別議員嘅取態經常五時花六時變，激到部分建制派紮紮跳！

改善形象 除不穩定因素

據聞建制派內部明白呢個死結「宜解不宜結」，所以趁住立法會換屆，就將上屆表現差勁嘅功能界別議員踢走，取而代之嘅幾乎全是有心有力之輩，包括已自動當選嘅金融界吳亮星、中總代表廖長江、勞工界「勞聯」潘兆平、工聯會郭偉強及鄧家彪，連同強勢參選嘅體育界馬逢國、旅遊界姚思榮等，期望改善功能界別形象外，亦可為建制派數票除去不穩定因素，藉此為建制派重新磨合創造有利條件。

雖然多個功能界別嘅「大懶蟲」議員不穩定因素已除，但有部分建制派人士仍然感到恐懼，直言新一屆立會不能有新嘅「神經刀」出現，再次令大家為數票食驚風散喎！究竟新一屆建制派組成是否換湯不換藥，是否仍然有各自為政、不顧全大局嘅情況，就要拭目以待喇。體育、演藝、文化及出版界候選人仲有蕭思江、周俊輝；旅遊界候選人仲有葉慶寧。