同前扶委會成員交流
政府早就宣布會重設扶貧委員會（扶委會），政務司司長林鄭月娥尋日就聯同勞工及福利局局長張建宗及今屆扶委會籌備小組成員，與一班前扶委會委員見面同交流，又出席香港社會服務聯會活動，聽吓大家對扶貧嘅真知灼見。
眾所周知，林太嘅前上司、前政務司司長唐英年係當年扶委會嘅主席，當大家熱切期待唐唐同林鄭兩位新舊政務司司長出現歷史性會面之際，先至發覺政府原來根本冇邀請到當年嘅扶委會官方成員出席尋日嘅會面，令到唔少人大失所望。
雖然係咁，林太事後盛讚呢班前委員為扶委會打下良好扶貧基礎，並強調解決貧窮問題，需要吸收民間智慧同兼顧地區需要。