湯家驊與記者對答實錄

答：我係漏報咗，呢啲全部係我私人公司，我屋企嘅嘢，今屆確係漏報咗。當時何俊仁被揭發漏報咗（與弟婦同共擁有的公司股份），當時我就即刻叫我助理check check（翻查），佢返嚟話無報，於是我即刻報番。事實上係我漏報咗，好對唔住，我要對公眾致歉，但係老實講呢個係技術上嘅申報啦，我都補番，我希望選民會了解。

問：可唔可以講吓呢七間公司所持有嘅業務係咩？

答：無業務，佢唔係做生意，係屋企投資、物業，有啲甚至係揸住一啲高爾夫球會嘅會籍，全部唔係做生意。

問：純粹係揸住一啲嘢？

答：股票呀、物業呀、會籍呀。

問：記唔記得最耐係幾耐？

答：有十年八年。

問：○四年參選無申報，嗰時係覺得呢啲公司唔需要？

答：我自己好私人嘅物業，我又唔係做生意，當時覺得係咪一定要申報呢？咁之後就無放喺心裏面。第二屆當選我完全都無諗過，直至何俊仁呢件事，到選舉咩嘢都會畀人摷出嚟，所以我即刻叫助理補番。

問：驚唔驚會影響選情？

答：呢個係事實，我唔可以抵賴，我亦都公開承認。你知道我唔係一個完人，我好多時都會做錯嘢，技術性或者唔係技術性，我相信選民會接受我係一個咁嘅人囉。我如果話我係一個完人，我都係呃緊我嘅選民。我當然有犯錯，有犯錯我一定會接受，一定會承認，會道歉。我只可以講，一直以嚟，我都覺得呢啲係我好私人嘅嘢，係我屋企嘅嘢。

問：點解要咁多間公司，唔係一兩間？

答：因為有啲係我個人嘅trust（信託），我屋企嘅trust（信託），呢啲好個人，我唔希望公開講，但絕對係無涉及任何商業性嘅活動。

問：七間係全部定係仲有？

答：報呢七間我都無報公民黨（總部物業）嗰間，因為我實在真係醒唔起嗰間公司我係要報，如果唔係我都唔會畀你哋寫兩次啦。一次又一次，但我真係對呢啲嘢，我唔係擺喺心裏邊，對唔住。

問：會唔會叫其他黨友都檢視番自己？

答：我已即刻同黨魁（梁家傑）講咗有件咁嘅事，其他我唔敢過問其他立法會嘅同事，或黨友呢方面嘅嘢，我覺得佢哋點樣處理係佢哋嘅事，我自己要處理我自己嘅事。我即時申報番，算係一種交代。