政情：李家傑黃英豪 望門檻興嘆?
人大政協換屆花落誰家將會喺明年初揭盅，綜合政界消息最少有三個政協常委空缺，奈何僧多粥少，政圈盛傳至少有十多名親中人士希望「升呢」，正出盡法寶四出爭取支持。不過就喺各人爭崩頭之際，有傳政協常委嘅最新入場門檻，係至少要五十五歲同至少做過兩屆政協，如果根據呢個原則辦事，盛傳出任政協常委大熱嘅恒基地產主席「四叔」李兆基長子李家傑，只可以同呢個職銜擦身而過。呢個新標準係真係假冇人可以說得準，但可以肯定嘅係呢場親中兵團嘅你爭我奪只會愈演愈烈。
每逢人大政協換屆，親中圈子嘅「卡位戰」就矚目上演。眾所周知，特首梁振英早前已辭去政協常委職務，正畀廉署調查嘅前政務司司長許仕仁，如無意外亦會自行求去，連同早年離世嘅徐展堂，形成今次至少有三個政協常委退下來嘅局面。
七人疑角逐 北京頭都痛
據聞親中圈子好多人都對政協常委嘅職銜虎視眈眈，四叔長子李家傑、福建幫林樹哲、廣東社團聯會主席王國強、中總會長蔡冠深同副會長、兼「牛仔褲大王」楊釗、「新金王」黃英豪、民建聯主席譚耀宗等都疑似會角逐，面對呢個局面，據聞北京都覺得好頭痛，早排傳出政協有不成文規定，就係年屆七十歲或者做過三屆或以上就要「退伍」，此時親中圈子又突然流傳做政協常委有新門檻，即入場門檻係五十五歲，同埋至少要做過兩屆全國政協委員。
究竟呢個入場門檻對邊啲疑似角逐嘅人有最大影響呢？有親中人士分析，倘呢個門檻係真嘅，最受影響係李家傑同黃英豪，因為二人都未夠五十歲，即時被out出局，不過亦有政界中人話，李家傑喺一眾疑似候選人中，商界背景較濃，而且對內地發展嘅支持不遺餘力，加上依家係爭做政協常委嘅關鍵時刻，唔排除有人故意放啲煙幕，令部分大熱人選以為上位無望而鬆懈。究竟呢場政協常委爭奪戰邊幾個幸運兒可以脫穎而出，相信都仲要等多幾個月至可以明朗化。