暑假係畢業生嘅求職高峰期，勞工及福利局局長張建宗（小肥張）好關心呢班明日棟樑嘅前途，尋日喺網誌上載咗一篇名為「助年青人展翅飛翔」嘅文章，內容除咗例牌講吓勞工處提供嘅就業援助及服務外，仲乘機趁住倫敦奧運熱潮，向「牛下女車神」、倫敦奧運單車凱林賽銅牌得主李慧詩抽水，引用慧詩接受媒體訪問時講過嘅「每個人都有自己的潛能，只怕你沒有夢想」說話，勉勵年輕人要努力去搵自己嘅就業方向。
小肥張坦言，年輕人搵第一份工唔容易，有時仲聽到僱主投訴話啲年輕求職者好驚同人溝通，甚至臨場甩底，無疑係有啲年輕人缺乏自信，建議最好就先接受職前及在職培訓。佢又話，自己今個夏天同「起飛」二字好似結下不解緣，除咗同見習飛機維修員見面、參加機場職業博覽會、出席中國航天員訪港活動外，尋日仲見證咗某航空公司學員畢業禮，令佢諗起一班航班起飛背後，有幾多不可或缺嘅人員喺背後默默耕耘。