政情：李嘉誠做善事 從心出發
由李嘉誠基金會策劃嘅「Love Ideas,Love HK集思公益計劃」，尋日搞咗個仁者仁心交流會，視基金會為「第三個仔」嘅長實集團主席李嘉誠，突然透過視像會議喺逾六百位參加者面前現身打氣，仲被司儀膽粗粗問佢「搞呢個計劃係咪為咗出名？」誠哥就笑笑口回應話：「我實在已經出咗名，用咁嘅成本去（達到）呢個經濟效益係冇人會做」，佢仲話自己追求忘我境界，咁就已經心滿意足喇。
撥近五千萬資助337個項目
李嘉誠仲話，呢個世界上有各種問題，冇可能全部解決到，惟有靠多啲人去承擔多啲社會服務，就好似呢個計劃咁，而效益唔係用錢去衡量，係要用心去睇。明年仲會唔會繼續推展計劃？誠哥就話基金會嘅原則係一定會繼續支持，亦會聽吓大家意見，睇吓點利用呢個平台為香港做更多有意義嘅事。
有關計劃係李嘉誠基金會撥款三億元策劃嘅「香港仁 愛香港」公益活動嘅首項活動，目前已推展到第三回合，共有三百三十七個獲選愛心項目落實，合共獲資助約四千九百萬元，以弘揚社會正能量。今年計劃仲新增咗個專業獎項，由匡智地區支援中心（新界北區）及外傭機構MFMW Ltd獲得，兩項計劃分別可獲一百萬元資助。