政情：潘佩璆為選戰 白髮變黑
工聯會立法會議員王國興今屆選舉由新界西，轉戰有唔少中產選民嘅港島，對形象草根嘅佢同成個工聯會都係一項挑戰。為突圍而出，王國興團隊尋日開咗個名為「工道．仁心」嘅社交網站，除咗介紹參選政綱外，仲拍咗多段短片宣傳，其中排名單第二名嘅勞工界立會議員潘佩璆就以全新形象粉墨登場，最後更鬧出笑話。
任職精神科專科醫生嘅潘醫生，本身一頭華髮，但係喺片中竟然變到「烏卒卒」。佢透露個頭係用一次性染髮劑染黑，拍完片後，足足洗咗五次先至變番白，當日本來約咗老婆都被迫遲到。
講開又講，王國興之前因應付立會拉布整傷嘅頸部，食咗三星期藥已經痊愈，不過佢仍然隨身帶住頸箍，喺搭長途車時戴上，以免再次整親。
參選港島區嘅仲有曾鈺成、鍾樹根、葉劉淑儀、劉健儀、陳家洛、何秀蘭、單仲偕、劉嘉鴻、勞永樂、許清安、吳文遠、吳榮春及何家泰名單。