中環出更：伍穎梅被問婚期 甜笑話「諗緊」
有「九巴金公主」之稱嘅伍穎梅（Winnie），自從年前同中建企業董事許晉平嘅戀情曝光後，兩人都好低調談情。
座駕泊中建車位
不過，卓妮有次行經中環中建大廈停車場時，就見到Winnie部座駕喺度停泊，到尋日亦見佢部房車喺度，似乎「進駐」咗呢個停車場。據講呢個停車場泊車位唔多，相信高層人士先有車位，睇嚟Winnie嘅地位不言而喻喇。
卓妮尋日下午茶時間行經中環ifc，又遇到Winnie現身，佢邊行邊打電話，原來佢等緊司機接佢出席一個慶祝活動。問到點解佢部房車經常停泊喺中建大廈停車場時，Winnie就邊講邊甜笑話：「又畀你睇到？咁啱有位啫，泊嗰度方便我買嘢！」乜真係咁啱？再追問佢幾時好事近？Winnie就繼續甜笑話「諗緊」喎。唔知佢會唔會趕喺龍年完成人生大事呢？