中環出更：陳李妮遊加州 嗒米芝蓮正菜
博愛醫院副主席陳李妮（Lily）最近神采飛揚，原來佢趁老公去美國加州開會，隨夫去享受咗個長達三星期嘅悠長假期。兩人喺七月中旬出發，足迹遍布加州各地，嘗美酒、啖海鮮，玩到樂不思蜀。Lily好注重食療養生，此行仲帶埋大量湯料越洋過海，包括沙參、玉竹及花旗參等清熱滋陰湯水，結果去程行李篋已有四個咁多。靚女咁賢慧，難怪老公錫到燶。
住酒莊 瞓醒去試酒
Lily此行最難忘嘅趣聞，首推喺加州著名產酒區Napa Valley嘅經歷，事關佢同老公都鍾意摸酒杯，兩人特登喺酒莊住幾日，每朝瞓醒就去試酒，不知幾寫意。一場來到，又點可以錯過由全美最佳廚師主理嘅米芝蓮法國餐廳French Laundry呢？Lily盛裝與老公享受浪漫燭光晚餐，點九道菜配搭九款酒，印象最深刻係頭盤「Oyster Leaf」（蠔汁葉子），蠔殼盛載住嘅竟然係兩片已煮熟嘅樹葉，但充滿蠔味，認真搞鬼。Lily急不及待影相與朋友分享，雖然唔知葉片係乜嘢植物，但小妮子話，拌住蠔汁一齊食，都幾鮮甜喎！
