何俊仁及李永達與本報記者對答實錄

問：點解你哋三人會合組公司，而呢間公司又持有物業租畀民主黨，收民主黨每年幾十萬？

答：仲有一個大股東呀，佢係代表一個支援民主嘅贊助人。我哋全部係掛名，只係信託人，即係我哋無利益，你睇唔到我哋有任何股息，未分過一毫子股息，亦無一毫子董事袍金。

問：既然持有公司股權百分之一，點解喺立法會議員個人利益登記冊上無登記？

答：我哋所理解嘅係，由於我哋無利益，所以唔使申報，如果有利益至要申報。

問：點解要喺○八年（立法會）選舉前才有這個（轉讓股權）舉動？

答：其實好耐嘅事，由大股東所持有，無轉過股權。我哋無購入，無畀過一毫子，係有啲人唔再有興趣持有呢間公司做信託人，交畀我哋，由頭到尾一毫子都無過手。

問：民主黨每年都向SOUND FACTOR交租金租借物業，而SOUND FACTOR係你哋持有，有無落你哋身上？

答：無！無！無落過私人袋。

問：咁每年嘅租金收入去咗邊？

答：都係個公司贊助人，係用嚟贊助民主活動，所以我哋無股息。

問：咁大股東唔係你哋，係邊個呢？

答：我唔想講佢個名，因為佢都係信託人之一，係贊助人，佢係用一個人寄名去持有一間公司。

問：如果事件揭發出嚟，會唔會有咩問題？

答：事件都發生咁耐，如果有利益先有問題，你睇吓搵唔搵到我、李柱銘、李永達收過一毫子錢？全部每一毫子係用番晒支持民主運動。呢件事係好清楚，SOUND FACTOR有贊助我哋活動，例如好似係「青台」嗰個網台啦，都係贊助呢啲活動。

問：但點解有股東想你哋持有間公司？

答：有啲股東唔想再用佢哋個名，我哋持有咗有時都只係負責簽名，李柱銘當初都唔想用佢個名，但我哋話遲啲先睇吓邊個幫手啦，即係贊助人想搵一啲民主派，或者民主黨信得過嘅人幫手嚟運作間公司，但佢話事啲錢點樣用。

李永達：

問：你喺SOUND FACTOR有咩角色？

答：基本上係無袍金、無利益，我就係咁簡單。

問：點解唔使申報？

答：據我理解，無利益就唔使申報。

問：但SOUND FACTOR每年收民主黨幾十萬租金，有無利益衝突？

答：好簡單，我哋無分紅、無收利益，亦無收錢。

問：你哋持有公司，公司又收民主黨錢，呢個循環有無問題？

答：第一，民主黨租金唔係嚟自公帑，第二，我哋角色只係其中一個股東，而且係無利益嘅。

問：點解持有一間公司但又要無利益？

答：咁你問倒我嘞，都過咗一段時間，我唔記得咗，肯定無分錢，你提番我先知呢件事。呢件事唔涉及公帑，我哋無收袍金、無利益，唔覺得有咩觀感問題，只係一個黨物業由幾個黨員持有。