政情：公職太多 王英偉要分身
工作點忙都要休息嘅，公職多到十隻手指數唔晒嘅全國人大代表王英偉（Wilfred）選擇工作旅行一take過。Wilfred九月將以藝術發展局主席身份，率領本地年輕藝術家到利物浦參加雙年展。王太就喺老公不在港期間自己搵娛樂節目，約埋一班中學同學遊東歐。兩夫婦相約最後一站喺倫敦，拍番個短拖先返港。
尋日Wilfred話，自己剛剛夠期卸任機場管理局同旅遊發展局成員，浸會大學校董會暨諮議會主席嘅任期亦將於年底屆滿，至於會否再選下屆人大，佢就話仲未知喎。佢笑謂，可能政府見佢「得閒咗啲」，轉個頭又委任佢做公務員薪俸及服務條件常務委員會主席，連埋國際電影節協會主席及太平洋地區經濟理事會主席等公職，真係分身都唔掂。老公咁忙，難得賢妻從來冇詐型，囝囝係歌手王梓軒，王太話，淨係做囝囝嘅經理人已經夠晒忙。