政情：「岸膠之災」齊抽水
立法會選舉前夕，社會議題好容易會淪為政黨嘅抽水工具，繼早前風起雲湧嘅國民教育後，近日本港海岸再次捲起「岸膠之災」。十號風球韋森特將一百五十噸塑膠原材料聚丙烯膠粒吹晒落海，多個海岸頓變白雪一片，但政府就太過「專注」埋首追蹤膠粒所以遲遲未有對外公布。多個政黨趁尋日就不約而同，棄企街站轉行做離島特警，紛紛去沿岸多個海灘執膠粒。
數百市民尋日齊齊響應呼籲，齊齊犧牲假期，喺烈日當空下前往受影響嘅地方清理膠粒，而網上亦瘋傳一個又一個清理膠粒嘅溫馨提示，邊個地點最欠缺人手、前往離島嘅交通安排，以至點賺取車費回贈嘅秘技都有埋，為嘅就係要聚集民間力量，攜手清走呢個潛在生態危機。
而政黨喺選舉前夕亦好似特別容易受到環保團體感召，不約而同加入掃膠行列，好似公民黨、人民力量同社民連尋日都有派員「執膠」，而當中又咁啱會有一個半個立法會選舉候選人，首屆派員出選立法會嘅新民主同盟雖然下午有造勢大會，但亦不忘擠出上午時間，八點幾就出發梅窩執膠粒，仲有感而發以膠粒比喻香港政治，話今次中資公司嘅膠粒「無孔不入滲透」香港，象徵意義非常之大咁話。
不惜闖海龜產房
有人出手執膠，亦有人選擇出海視察，民主黨尋日就出海，主力去人煙罕至嘅地方，視察膠粒擴散嘅情況，最遠仲去到蒲台島添！佢哋話要政府問責都要講證據，如果唔去睇吓膠粒擴散嘅嚴重程度，齋鬧又好似有啲不負責任，於是就拍埋片影埋相畀相關部門跟進，仲不惜「入侵」海龜生蛋嘅「禁區」。
除咗直選議員要攞社會議題抽水外，估唔到功能組別都受惠於今次嘅「岸膠之災」，今次受惠嘅界別就係漁農界喇！漁農界今屆罕有地出現競爭，候選人之一嘅經濟動力陳美德尋日就去東灣視察魚排情況，今日仲會去漁護處投訴。而民建聯見勢色唔對，尋日拿拿臨拉埋幾位候選人，由漁農界候選人何俊賢帶路，視察長洲魚排，唔通真係有水不抽非政客？