中環出更：名人食麵籌款捐小母牛

小母牛提倡「送人牛奶，不如助人養牛」，身為籌委會主席嘅杜振源好認同呢個觀念，佢話最初做主席好唔習慣，因為要放下身段開口叫人捐錢唔係咁易，既想得到朋友支持，但又怕過火令人唔舒服，最怕對方有被「劏」嘅感覺，搞到佢有難以「落手」嘅感覺。不過一次生兩次熟，上次佢哋搞慈善宴，一支底價五萬元嘅紅酒，老友一舉手就嗌價五十萬，結果一晚籌得六百萬，令佢深明做善事係講感染力，友儕間互相感染，先可以齊心事成。

陳正欣亦好認同，佢嘅業務分布內地多個省份，每年員工都會組團落嚟香港參加小母牛嘅競步善行比賽，最初陳生要邀請佢哋，但依家大家都好自發性，搞到依家活動變成佢公司一個獎勵項目，除咗參賽仲可以放多兩日假遊香港，果然善有善報。陳生話最初鼓勵員工參加係想大家知道香港人點做善事，但依家已經感染到佢哋會自發愛心，所以佢同太太都好感動。

杜振源（右）出錢，鄧慶治（左）父子出麵，共襄善舉。（溫國佳攝）	石禮謙（右）已經喺立法會選舉自動當選，尋日同女友Lisa一齊去食麵。	財經事務及庫務局常秘區璟智（右）同老公拍拖做善事，絕對係最佳活動。

共籌款35萬元

上年杜生喺中環一間拉麵店包場請員工食拉麵做善事捐款畀小母牛，今年杜生再接再厲，喺尖沙咀分店舉行，仲感染到其他小母牛籌委會成員陳正欣、南旋集團主席王庭聰同「燈芯絨大王」江達可一齊包場，短短五小時，就為小母牛帶來卅五萬元善款。

卓妮