女人街檔友齊為阿娟打氣
【本報訊】生命走到危急關頭時，往往才印證出親情、友情在。慈母陳旭娟不但是家人的好女兒、好姊姊，也是朋友眼中樂於助人的有心人。阿娟在女人街手袋檔當店員約兩年，甚獲其他攤檔的售貨員喜歡，每晚數名「好姊妹」更在檔口煮飯，邊吃邊笑又捱過辛勞一天。其中一名攤檔朋友許小姐稱，彼此結成好友皆因阿娟「幫人從來唔托手o架，好熱心好好人！」
勤奮慳家人緣佳
昨日到醫院探望阿娟的許小姐慨嘆，十分擔心好友情況，「啱啱先坐完月，突然間搞成咁樣，任何有同情心嘅人，見到佢咁都會唔舒服，佢ＢＢ仲啱啱出世……」許表示，去年在女人街攤位當售貨員，位置毗鄰阿娟工作的檔口，雙方因而結識。許在女人街工作數個月，均會與阿娟一起在檔口煮晚飯，為求省點生活開支，餸菜又較餐廳的健康。
許形容阿娟為人又好又勤力，「如果我有咩生活用品想買，但睇住檔口行唔開，佢都會幫我，唔會怕麻煩托手o架。好似我檔口用清售貨膠袋，佢都幫我買埋。玩電腦有咩唔識，又會教到我識為止。」兩人友情深厚，故許小姐雖現已不在女人街工作，仍與阿娟保持聯絡，聞好友病訊亦趕往醫院。
阿娟另一朋友劉小姐則說，上兩個星期才到訪其家探望新生B女，見她現時病況實在嚇一跳，「她當時只說食唔好，瞓唔好，仲以為賀爾蒙失調。」她指阿娟十分好人，不然就難成好友，「真的好擔心，她平日不會亂食嘢，工作時亦自己煮東西，她仲話坐完月返內地探大女，點知嚟咗醫院。」她希望阿娟身體盡快好起來。