中環出更：橋牌名人賽 高手雲集
世界各地嘅橋牌高手近日雲集香港，事關由香港橋牌協會主辦嘅「香港城市橋牌錦標賽」，尋日喺銅鑼灣富豪酒店揭幕。公開賽登場前，主辦機構先來一場名人賽，城中一眾橋牌發燒友爭相落場過吓癮，包括世界橋牌聯盟副主席兼中國金融租賃主席蔡國雄、馬會大董李家祥（Eric）及友邦保險榮譽主席謝仕榮等人。
眾人苦戰成晚，最後由今年全國橋牌錦標賽冠軍、吉利汽車行政總裁桂生悅及大師級國手戴建明組合，以絕對優勢奪冠。定居喺香港嘅桂生悅，牌藝媲美專業級，難怪被老友講笑話，佢做老總係業餘，打橋牌至係專業。
單偉彪望多啲新血加入
見到咁多老友嚟撐場，協會主席兼惠記集團副主席單偉彪好開心，但佢呻話喺香港推廣橋牌殊不簡單，因為初學者至少要三至五個月時間先至嘗到箇中樂趣。佢試過用鋤大Ｄ做比喻，教自己囡囡打橋牌，點知阿女學識鋤大Ｄ好開心，就唔肯再學橋牌喇！依家佢哋致力喺校園搞校際比賽，希望多啲新血加入，令橋牌運動普及化。
每年都參加名人賽嘅Eric，就同太太拍拖嚟到。講起同佢一樣出身會計師嘅陳茂波（Paul）出任發展局局長，原來兩人唔止係同行，仲係鄰居，相識好多年。李家祥盛讚阿Paul「老實可靠」，祝福佢大展鴻圖，為市民及發展商創造雙贏。
卓妮