政情：潘德鄰否認被勸退
今屆立法會選舉嘅參選人數冠絕歷屆，但離奇退選個案亦特別多，繼金融服務界詹培忠退選並暗示被勸退後，剛於前日報名參選醫學界嘅著名骨科醫生潘德鄰，亦喺尋日提名期截止前一粒鐘申請退選，表面理由係未能及時放棄居英權，否認被人勸退或被揭黑材料，但同時承認決定參選後呢兩日，發生好多事：「其實所有嘅過程都有一啲估計唔到嘅事，但詳細我哋唔需要講喇，因為始終呢件事我哋依家已經唔能夠還原。」
潘醫生前日報名時，信誓旦旦咁話當選後會放棄診所業務做全職議員，又強調會以理性分析做賣點，力圖打破自己嘅建制派形象，點知一日之後就極速退選，話唔係畀人勸退，實在好難令人相信囉！政界盛傳嘅版本係，現任醫學界議員梁家騮雖然亦會偶爾倒戈，但都唔及另一參選人醫學會會長謝鴻興咁難以預測同控制，因此立即有人出手勸退票源同梁家騮較為相近嘅潘德鄰。