政情：潘兆平繼承英姐硬淨風格
做咗立法會勞工界議員十二年嘅勞聯李鳳英退休唔選，佢尋日就陪埋接班人、勞聯主席潘兆平報名參選立法會。英姐一向不畏強權，花名「潘少」嘅潘兆平就話，佢都有向英姐學嘢，總之到時入到議會嘅話，都會好似英姐咁，對唔合理嘅嘢會堅決抗爭咁話。
潘少今次參選，有英姐做佢嘅競選團長，仲攞到成三十個提名，英姐仲好唔話得，自己唔選都陪潘少周圍去拜見工會同公務員團體拉票。潘少就話，如果當選一定會效法英姐，「合理嘅就支持，唔合理嘅會堅決反對」，仲會積極爭取政府設立標準工時、勞工假同法定假期睇齊等。
英姐喺立法會辯論時經常都有金句，對住啲高官依然字字鏗鏘。我哋就問潘少有冇叫英姐過幾招畀佢，或者自己練習下啲辯論技巧，點知佢就話自己係破產欠薪保障基金委員會及生產力促進局嘅委員，又曾經係勞顧會成員，經常都同官員打交道，所以冇有怕咁話。