政情：出戰立會 要揀吉時報名？
立法會選舉提名期已展開一星期，尋日眾多報名之中，有近十份表格都喺早上十一點或之後提交，莫非係參選人特登擇咗吉時報名？原來尋日早上十一點至下午一點，同下午一點至三點都係喜辰，而凶時就喺早上九點至十一點。堪輿學家麥玲玲話，尋日係「定日」，係個唔錯嘅日子。「定日」即係安定繁榮嘅意思，適合出行、會友等，有利於屬虎、羊、兔嘅人士，如果配合相對嘅生肖喺喜辰報名，當選機會都高啲喎。
尋日早上十一點報名嘅參選人有好多，功能界別就有鄉議局主席劉皇發參選鄉議局、林健鋒參選商界、石禮謙參選地產及建造界，而報名參加直選嘅就有好多，包括參選新界西直選嘅前律師會會長何君堯。當中何君堯唔單止喺吉時報名，佢仲係屬虎，莫非佢因為首次出戰直選要擇啱時辰報名？新界西參選名單仲有人民力量陳偉業、民建聯譚耀宗名單、陳恒鑌及梁志祥、民協廖成利、公民黨郭家麒、工聯會麥美娟、民主陣線麥業成、新民黨田北辰、街工梁耀忠、民主黨李永達及陳樹英名單、「第三力量」陳強、工黨李卓人。