中環出更：劉美詩腳頭好 帶旺新公司
前康泰旅行社一姐劉美詩（Susanna），過檔「專業旅運」任市場及業務發展總經理已大半年，腳頭認真旺，除分店愈開愈多，其公司仲奪得2011年「香港服務名牌獎」，認真好運。
瘦身成功嘅Susanna，尋日同公司行政總裁高鄭杏芬齊出席香港品牌發展局發布會，分享得獎感受。Susanna笑言依家份工毋須再面對「大鑊嘢」，輕鬆好多，閒來學瑜伽及健康舞，眨眼就瘦幾磅，睇落fit咗又後生咗。Susanna又趁暑假同朋友及家人暢遊大阪、京都，由大阪自駕遊去京都，去到邊買到邊，滿載而歸。伊人一向諗頭多，去到新公司後，點子不絕。Susanna話，依家佢哋有五十五間分店，計劃未來三年將分店擴充至一百間，即係話仲有一半目標要努力喇。
香港品牌頒獎禮
同樣獲選嘅，仲有獲得「香港名牌」嘅「維記牛奶」，而生產本地陀飛輪手錶嘅「萬希泉」就獲得「新星品牌」。婚戀約會服務公司「緣來這麼近」，就獲得「新星服務品牌」。
「盛女」話題早前熱爆全城，「緣來這麼近」總監陳秀琼就盛讚港女條件高，求偶會員中不乏女醫生、女檢控官及精算師等，冇拖拍只係因為無時間，並非係「盛女」喎。