政情：星爺寸李國寶虛度光陰？
港區人大代表兼中銀高層吳亮星（星爺）尋日報名參選立法會金融界功能界別，打算接替放棄連任、有「三點不露」之稱嘅李國寶。李國寶之前話喺立法會廿七年係浪費時間，星爺就話唔評論啲議員喇，但就叫大家睇長遠啲，仲話：「之前嘥咗就嘥咗（時間），睇之後實際啲！」唔通佢都認同李國寶霸住個議席係虛度光陰？
李國寶之前話喺議會係浪費時間，星爺就話︰「銀行界嘅人都係希望今日做嘢今日有效果，存咗錢就想有利息，唔想嘥咗啲成本。」又話：「之前嘥咗就嘥咗」，希望大家日後睇長遠啲喎。對於李國寶成日畀人話佢唔去開立法會，星爺就認為：「報咗committee（委員會）就要評估自己」，仲話如果當選嘅話，唔排除到時同其他獨立議員籌組「早餐會」，一齊合作咁話，意味以前嘅「早餐會」復活。
至於入咗議會後會唔會成為政府「鐵票」，星爺話，如果新政府想搞好民生嘅心愈大，佢鐵票機會就愈高。佢又話，依家啲議員成日話「是其是、非其非」，但就好多人都吝嗇於「是其是」，應該讚嘅唔見得有人讚咁話。