中環出更：劉展灝怕遠行寧願北上hea吓
暑假係旅行高峰期，唔少名人都趁馬季抖暑同一家大細外遊，到異國抖暑叉電。不過，工業總會副主席劉展灝（Stanley）就例外，卓妮早前見到佢同新抱Daphne現身沙田馬場，佢話平時公幹已經成日周圍飛，所以放假寧願同太太近近哋到中山打吓高爾夫球，食吓粵菜，hea住過二人世界仲好。
做鐘錶生意嘅Stanley話，佢平均每個月都搭兩次長途飛機，來回廿幾個鐘頭，真係搭到怕怕，加上佢成日唔喺香港，老婆大人不免會詐型。難得暑期清閒啲，佢就即刻帶太太拍拖旅行補數，至於兩個囝囝，就各有節目。