政情：Tim霍被勸退 隨時一拍兩散
新一屆立法會選舉提名期今日開始，無論地區直選、超級區議會及功能界別嘅選情都波濤洶湧。早前我哋講過，年紀大兼且口碑麻麻嘅功能界別議員，包括金融界李國寶、商界（第二）黃宜弘、體育、演藝、文化及出版界霍震霆（Tim霍）等都無得留低。不過，近日就傳出體育同文化界有人不滿Tim霍被踢走，部分選民醞釀投白票表達不滿，更擬游說泛民主派人士參選，實行一拍兩散。
汪阿姐：佢比較專注體育
有消息傳出，有關方面近日已正式勸退Tim霍，改為支持做電影出身嘅港區人大代表馬逢國接棒。雖然Tim霍無公開表露不滿，但業界就有不滿聲音，諗住發動喺九月選舉中投白票。與此同時，有人亦想泛民派人加入混戰，除咗早前宣布參選嘅八十後周俊輝外，傳聞有人搵啱啱失落文化局局長寶座嘅前灣仔區議會主席黃英琦出戰。不過，黃英琦就否認有人搵過佢，而佢亦絕對唔會參加功能界別選舉。
其實Tim霍一直被指側重於體育界，對於演藝、文化及出版等範疇嘅工作，似乎就冇乜貢獻，引來唔少界內選民不滿。咁啱尋日係油麻地戲院改建為粵劇中心開幕嘅大日子，粵劇界大老倌阮兆輝、羅家英及全國政協委員汪明荃（汪阿姐）都有出席。被問到Tim霍任內嘅表現，汪阿姐好老實話：「佢比較專注體育方面！」相信呢個答案或多或少都反映到業界嘅不滿聲音。
對於馬逢國參選，汪阿姐就話同馬逢國都識咗一段時間，亦算熟落，但就冇表態係咪支持，話要睇埋有乜嘢人報名參選先表態。體育界內一直盛傳，身兼港協暨奧委會會長嘅Tim霍，一直想搵囝囝霍啟剛繼承佢嘅政治事業，奈何啟剛未成氣候，所以佢想做多一屆，四年後先至交棒。Tim霍尋日喺立法會話，佢嘅任內表現要交由業界定論，但佢坦言，就算將來唔做立法會議員，相信喺其他崗位都可以服務社會喎，莫非佢已經打定輸數？