政情：馮國經籲港人登高望遠
不斷有人講話香港嘅優勢逐漸消失，原來仲包括香港作為東南亞華僑中心一項。斷斷續續被認為會參選特首嘅利豐集團榮譽主席馮國經（Victor）慨嘆話，回歸十五年，香港嘅東南亞華僑中心地位已經畀新加坡取代咗。佢認為香港年輕一代應登高望遠，記住香港嘅市場唔只七百萬，而係數以億計嘅內地同胞。
Victor喺哈佛攞到博士學位，仲做埋教授，返港後又做過唔少公職，依家係大珠三角商務委員會主席，的確有佢遼闊嘅視野。好少喺大氣電波講嘢嘅Victor，尋日接受電台訪問，講足粒幾鐘。Victor特別關心年輕人嘅發展機遇，呼籲香港大學生「走出去」，最好喺未畢業前去外國公司走一走，做暑期工也好，交流也好，總之放眼世界。Victor又引用佢母校哈佛嘅教學模式，話呢間世界級學府要求每位學生要有出國工作經驗，目的係年輕人對一切都未有定見，可塑性好高，呢個做法值得香港各大專院校好好學習喎。
Victor慨嘆話，香港十幾年前一直係東南亞華僑中心，跨國人才共冶一爐，可惜如今地位不保，被急速冒升嘅新加坡取代咗。Victor為香港經濟拆局，認為香港人要有國際視野，更要認識中國，咁至可以擔當香港與珠三角，甚至東盟嘅發展橋樑。香港面對嘅市場唔係只得七百萬人，而係數以億計嘅內地同胞。
唔怕撞板先有進步
喺商場長袖善舞嘅Victor，順便分享成功錦囊，佢點名讚爸爸馮漢柱係佢伯樂。話說Victor三十幾歲與弟弟馮國綸由美國返港，接掌家族生意，爸爸給予莫大信任，放手畀兩兄弟一展所長。Victor自爆撞板無數，但佢認為板唔怕撞，撞多啲板，先會進步。事業開遍世界，Victor仍以「滿招損，謙受益」做人生座右銘，不時聆聽員工意見。Victor話佢最珍惜人才，利豐嘅員工遍布五十幾個國家，每次開親高層會議，十足聯合國開會咁熱鬧。