近日民主黨主席何俊仁（鐵頭仁）孖住佢哋嘅屯門區議員陳樹英一齊出咗幅以「樹‧仁同心拍住上」為口號嘅宣傳橫額。
雖然大家都知佢哋只係用自己個名玩食字，但係就辣㷫咗班樹仁大學嘅學生哥，搞到樹仁大學學生會要喺社交網站出聲明，澄清同白鴿黨冇任何關係。有網民就話白鴿黨真係超冇創意，要抽人哋大學水。
鐵頭仁同陳樹英呢排一齊以「樹‧仁同心拍住上」嘅口號印製咗一批宣傳品。樹仁大學學生會喺facebook度話，有學生喺七一遊行見到，誤以為係大學學生團體嘅隊伍，所以強烈要求白鴿黨跟進，釋除大家疑慮。我哋問過樹仁大學學生事務處，佢哋話作為辦學團體，佢哋同政黨冇任何關係，希望我哋可以幫佢哋澄清。
唔少網友都話今次白鴿黨抽水抽得認真低莊，又話佢哋冇啲創意。鐵頭仁抽咗人哋大學水，仲要話係「好小事啫」，我哋問佢會唔會停用呢批宣傳品，佢就懶懶閒話會交畀助選團處理喎。