政情:特首辦大開請願之門

行政會議尋日正式開波,吸引唔少請願人士去為剛入主特首辦嘅梁振英「開齋」,出現嘅請願團體出奇地多,連明日黃花嘅貪曾曾蔭權亦「現身」特首辦。人比人比死人,唔係梁振英做咗特首之後開咗特首辦嘅大門,仲以為煲呔曾以前嘅做法,將請願人士同記者一干人等全部拒諸門外係正常嘅。

尋日特首辦外請願訴求五花八門,呢邊廂三四十名長者爭取全民退休保障,仲話要關注埋退休高官生活,連貪曾都擺上枱;嗰邊廂的士小巴團體就一邊熱烈彈琴祝賀CY「排除萬難」當選,一邊就要求恢復向乘客徵收燃料附加費,真係曲線到你唔信。就連保釣行動都動員出嚟分一杯羹,要求政府取消對保釣船海豐號禁制令,等保釣人士前往釣魚島,宣示中國主權,做好國民教育咁話,再加埋中港家庭從後高呼「BB要出世,媽媽無床位」,絕對感受到點解有啲人叫香港做「示威之都」。

之不過,入特首辦請願,先要排隊做登記。尋日特首辦保安就喺特首辦門外先設一「登記區」,如欲示威,必先登記,而每個團體配額一名。登記之後要再等保安姐姐逐一叫名方可內進,但要留意請願不可帶橫額,保釣人士不甘安定,誓要帶橫額內進,仲搞到挺梁請願人士就不滿自己嘅遞信被阻添。

尋日行會成員見到請願人士,基本上都大方接信,不過請願人士就好似唔係太識新任行會成員,例如周松崗就被誤認為選舉後為梁站台嘅鄭家純。

林煥光行秘道避傳媒

各行會成員尋日亦選擇以不同方式出場,有人施施然行入特首辦,有人揸車入,而張志剛更搭一紅色座駕——的士到場,不過佢哋嘅離場方式一致,會後亦怱怱循多道離開。行會召集人嘅林煥光尋日雖然有去開會,但傳媒等咗幾個鐘都唔見佢。其實傳媒都係提供個渠道畀佢哋開誠布公曝下光啫,你哋走得咁神秘,難怪市民會唔認得你哋。

CY上星期又承諾,會喺行會開會期間,開放特首辦大堂畀傳媒守候至開會完畢,仲話會配合採訪。尋日夏日炎炎三十幾度,唔使烈日當空守候行會完畢,記者們固然興奮,不過傳媒尋日一入到特首辦,就發現上星期尚在嘅茶几同梳化失蹤,唔知佢哋下星期會唔會出現番,真正做到配合傳媒採訪呢?

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報