中環出更：鄧鉅明：錶舖將汰弱留強

金王唱好黃金

卓妮早前喺婦協一個活動上遇見太子鐘錶珠寶主席鄧鉅明，佢話雖然佢哋最貴間舖月租三百萬元，全球經濟氣氛又麻麻，但係佢一啲都唔擔心，仲話依家先係時機，當年沙士之後到金融海嘯，短短幾年時間，佢哋由七間舖擴展到十三間，到咗今時今日，係汰弱留強嘅時刻，佢信心十足。

同一場合又見到「金王」黃英豪，依家金價回穩，「金王」繼續睇好黃金前景，因為黃金依家係多間大型中央銀行嘅儲備，所以佢睇好黃金，認為到年尾會升番上去。

既然係婦協活動，主角當然係一班姊妹，呢晚佢哋全部着旗袍出席，嘉賓就係特首夫人唐青儀，佢話做咗特首夫人之後做多咗好多社會公益事務，所以忙咗好多。