建制派喺港島區嘅直選選情，真係唔多理想，要喺十二萬票源入面，成功令五位建制派疑似候選人當選，實在難過登天，所以近排大家都開始瘋狂搶票，唔理隔籬左右生死。
最近有傳轉戰港島嘅自由黨主席劉健儀，成功拉攏知名度甚高嘅前立法會主席范徐麗泰幫手，聽聞范太答允唔會親自蒲頭，但會暗助劉健儀幾位拉票樁腳，如果屬實，劉健儀喺港島區嘅選情又可以樂觀番少少。
事實上，范太○四年喺港島區參選時，可以話係吸盡中間派票源，之後到○八年，范太唔參選，佢嘅樁腳就轉為力捧當時剛回流嘅葉劉淑儀，亦成功令葉太當選，如今葉劉可以靠個人名氣谷票，幾乎穩袋一席。所以最近有消息指出，幾位當年活躍灣仔區同東區嘅范太樁腳，近日靜悄悄暗幫劉健儀助選，部分雖然唔再係區議員，但都落手落腳聯絡街坊，成為缺乏樁腳嘅劉健儀一支強心針。
不過有知情人士分析，范太參選時係二○○四年，當年嘅樁腳都已經被工聯會同民建聯吸納得七七八八，究竟仲有幾多人可以幫劉健儀抬轎拉票，實在好大疑問。