政情：蒙德揚無懼日貨被抵制
日本日前聲言會將釣魚島「收歸國有」，惹起全球華人怒吼，代理日本樂聲牌產品嘅信興集團副主席蒙德揚（David）尋日現身沙田馬場，問佢怕唔怕呢件事會引起港人抵制日貨，佢就好淡定咁話，港人包容性高，唔擔心會影響生意喎。
David話，現時日本製品已經滲透到世界各地，就算件貨唔係日本牌子，裏面嘅零件都係日本製造，要避都避唔開。David笑言，香港人咁鍾意食日本嘢，如果抵制日貨，大家咪冇得食囉！
倫敦奧運月底就開鑼，David作為贊助商之一，話咁易就攞到飛，舉家去倫敦十日，觀賞游水、乒乓波同羽毛球比賽。
難得假期鬆一鬆，David仲打算去埋比利時行番轉，原來佢仲未去過。比利時嘅朱古力咁出名，佢笑言仔女都係朱古力迷，到時可以盡情食喎，真係廿四孝爸爸。