中環出更：莎莎小王子 百日宴潮着老西

喜宴上，首次榮升公公嘅郭少明「孫不離手」，Jacob同佢特別有緣，依在公公懷中，乖到極。郭太羅桂珍買BB衫樂在其中，孫兒套名牌西裝，都係佢託人喺歐洲買。

產後嘅莎莎太子女郭詩慧（Melody）極速修身，孖住老公陳振邦（Davis）恩愛現身。Melody湊仔親力親為，唔單止餵人奶，沖涼、換片亦一腳踢。最難忘Jacob換片時「請佢飲茶」。為讓囡囡住得開心，郭少明近日將早前購入嘅山頂大宅裝修好，等千金有個更舒適嘅安樂窩，盡快三年抱兩喎。

雷禮權（左起）一身英國潮牌，太太利蘊珍及女兒Alexandra都讚佢型格十足。

陳頌言

政商400賓客到賀

Davis榮升爸爸後，繼續做潮人。尋日穿上Vivienne Westwood恤衫配橙紅TOPMAN西裝，件恤衫原來係Jacob送畀佢嘅第一份父親節禮物，着上身特別冧。百日宴嘅賀禮，主人家準備捐畀保良局，認真善心。

呂鈞堯（中）與韓籍太太Miyoung（右）以英文、韓文及廣東話教仔，夠晒國際化。	鄭明明喺約旦河受洗，心情既興奮又激動。	保良總理陳細潔（左起）、珠寶公司太子女吳嘉淳，與名模陳祉妤齊撐場。

到賀賓客，政商界、慈善界都有，多達四百人，包括抱住一歲中韓混血BB呂授謙而來嘅前保良主席呂鈞堯、保良副主席鄭錦鐘夫婦及前行會成員梁智鴻夫婦等。九巴後人雷禮權啱啱由意大利歸來，穿上英倫名牌Hackett西裝，拎埋個Calvin Klein書包，走懷舊風。呢身打扮，原來係今年大熱之選喎。

美容教主鄭明明亦剛由以色列朝聖返港，今次同行嘅有前影星孫佳君、「拉丁舞后」黃蕊，齊齊喺約旦河受洗，場面感人。明明姐又狂掃十字架寶石吊墜送友人，收穫豐富。

卓妮