中環出更：何光耀撐真槍射擊 唔危險
手槍一向予人感覺冷酷無情，但原來唔少溫文爾雅嘅政商名人都鍾意玩。愛飾珠寶老闆何光耀（Mark）自廿年前喺美國首次接觸手槍射擊後，一試愛上，回港後考取槍牌，更不時到位於觀塘商廈內嘅「中國鎗會」練習實用射擊，與志同道合嘅槍會揸fit人任耀庭（Benny）成為老友。
Benny話手槍本身並唔危險，在於你點樣控制，「即使係一把生果刀，如果不當使用，都可以係武器。」佢話，射擊愛好者嘅背景廣泛，由上市公司主席以至的士司機都有。Benny仲大爆名人比較多要求，例如想攞支槍返屋企，或者想買零件改裝支槍，但喺法律監管下都唔成功。
講求EQ及自律性
射擊經驗豐富嘅Mark認為，玩槍首要條件有兩高，一係EQ（情緒智商）高，持槍者唔可以有脾氣，其次係自律性高，遵守遊戲規則。此外，射擊運動對壓力、體能及速度嘅要求比一般運動更高，要玩得叻絕對唔容易。電影中常有不少槍戰場面，Mark就笑言，睇戲始終超乎現實，事實上子彈穿透力強，車門、垃圾係擋唔到子彈嘅！
至於點樣可以攞到槍牌，Benny話現時本港槍會發牌制度極為嚴謹，全港只有逾一千人持有槍牌，考取槍牌必須經過十多個政府部門審批，除咗要有警務處發出嘅無犯案紀錄外，仲要修讀警察部提供嘅訓練課程，經過三至六個月練習及比賽後，再由槍會推薦考牌，警務處再派人主持考試，合格後方可獲發牌照。
卓妮